Bygginga i Tonningsgate er i gang
No skjer det i Skarbøvika. Gravemaskinene er på plass, og ny gangveg, sykkelveg med oppgradering av vegbana på strekninga frå Steinvågbrua er eit steg nærmare ferdigstilling.
- Vi har rydda ein del vegetasjon på sida av vegen for å gjere området klart til sprenging og graving, opplyser Torbjørn Vatnehol, prosjektleiar i Møre og Romsdal fylkeskommune.
Prosjektet er ein del av Bypakke Ålesund, og jobben som skal gjerast er å oppgradere vegbana med litt større breidde enn i dag. På begge sidene av bilvegen kjem eitt felt til fortau og eitt til sykkelfelt. Det planleggast også for etablering av kantstopp for buss på kvar side. Sjølve Steinvågbrua er ikkje del av dette prosjektet.
Sprenging og lysregulering
- I starten av byggeperioden må vi utføre sprengingsarbeid, seier prosjektleiaren.
- Då blir det behov for å stenge vegen i korte periodar på maks 15 minutt. Dette vil skje i perioden frå veke 39 – 43.
Fylkeskommunen skal sørge for god skilting og informasjon til naboar i byggeperioden, og det blir ikkje sprengingsarbeid i rushtida på morgon og ettermiddag. Mesta er entreprenør på prosjektet som er venta å stå ferdig i løpet av 2024.
Det kan vere verdt å merke seg at det er mykje byggeaktivitet i Skarbøvika, då fleire prosjekt har starta opp samstundes. Det gjeld både oppgradering av vatn- og avløp og bygging av Osanehallen.